Act 24 | WSK | STEP | Tom 5 namaram se Priest Supuling Ananias Caesarea nama aratam, nu, se supuling saki, se kari Tertullus nunga nuguring tauk balukko, mu buta arungu namaram. Ale nuna mel ko Paul den ningi betemonko mu ali supuling Felix manorman.

Acts 24

Felix koma te Paul den te atumukasan

1 Tom 5 namaram se Priest Supuling Ananias Caesarea nama aratam, nu, se supuling saki, se kari Tertullus nunga nuguring tauk balukko, mu buta arungu namaram. Ale nuna mel ko Paul den ningi betemonko mu ali supuling Felix manorman. 2 Se Felix Paul auram se tairam mu Tertullus den atumu Paul tua duap beteram, ale balam, “Kari biya Felix,” mam, “ni te ana ali sor imi te kam maiya biya kager mel bo me arikasan. Nika ikia yawara te ana bagara iru terong la aitak te bagasan. 3 Se ana apareyate apareyate, mu ana ni ko ko ninguru amilmilasan. 4 Bare ani kam maiya biya me ka kalikko. Se ani nika isarsam, ni gemang nangaru ale anananga den tukunangta ewere ikiko.

5 “Ana kari imi aringiman mu noko munan memek biya. Nu sor suen biya te geragakaso ale Juda alo nunga ningi kager daong patawurukko kariimet nongomang atumukaso, iwita ana aringiman. ^{▼▼Acts 24:6 Dugu duap imitang: Acts 21:28-30.} Nu kariimet sang pagaman ale anananga beteman, nunga bala Nazareth, wore nunga supuling bo. 6 Ale betela nu temple karur tugumokko ago kaeyakaso. Se ana iluman. 7 ^{▼▼Acts 24:6-8 Batoga saki girakala batagorman mu te den imi ago aniso: “Ale nangata nanga Munan Den te ko den aringinakko. Bare kager kari nunga supuling Lysias mu tairam, ale sail te nagiting te bataguru tam. Ale balam, kari nu den ningi betemonko mu taimon ni kema te den aringimonko mam.”} 8 Bare ni keta kari imi isaru mu, den ana ko nu den te atumuwasan mu ko kuring te agotala aratuk se ikiko.”

9 Se Juda alo suen la Tertullus den balam mu nunguningta makasan.

Paul Felix moke te numi duap apukaso

10 Se ali supuling Felix Paul munakurukko ko kuting te maonam. Se Paul den koma balam, “Ani ikisam ni yar suen biya kariimet imi nunga ningi den tutera ura bitakasam. Se ani nika den koma balikko mu angamang amilmil biyala. 11 Ni nunga isaru mu ka manarmonko, ani tom 12 namaram umu te diram ani Jerusalem Kaem nup patawirikko namerem. 12 Nuna ani kari bo ilak temple ningi den tagikasam se me agarkaman. Se aking apareyate synagogue ningi agi, wonong ningi agi, kariimet nongomang me atumukasam. 13 Ale nuna memek ani angimik te bita se anisan mu ko duap bo ta me ka manarmon se ni iki ale nunguningta meko.

14 “Bare mel suwanta ani wetang te balsam, nunguningta ani Munan nuna balsan munan kawel masan wore karo tui se nanga taleng girigir nanangatak ari nunga Kaem nup patowasam. ^{▼▼Acts 24:14,22 Nu Jesus ko Munan ko balso: Acts 9:2; 19:9,23; 22:4.} Mel suen biya Moses ko Law Den te se prophet alo nunga batoga te aniso, mu ani suen la ko angamang ningi nunguning aram. 15 Ale ani kari imi nunga turantala, ani kariimet kueman, ningo ta memek ta, wore Kaem baluk se aking barasomonko mu ko angamang ningi nunguning tala. ^{▼▼Acts 24:15 Kariimet kueman mu aking barasomonko: John 5:28-29.} 16 Buta se ani tom suen biya Kaem motam te, se kariimet nomotam te, angamang ningi ningo la te anirukko sail tagisam.

17 “Yar saki ani sor sang te geragawa Jerusalem pelerem namerem, aninga kariimet nungumik mel mena mu manga mel sang nungarik ale Kaem tama tuekko namerem. ^{▼▼Acts 24:17 Kris alo nunga sikisaki Jerusalem bagakasan mu nunga sangorman: Rom 15:25-26.} 18 Ale ani angimik ikup karur bo mena, temple ningi mel mu bitawerem se agarkaman. Ani kariimet motam biya agarak mena, nirung ngata bo mena tala. 19 Bare Asia sor te ko Juda kari sang taiman mu aninga ilu gilingiman. Se kari ari umutang ani ago ko den i nongote aniruk, mu taimon ni kema te balmon mu asele. 20 Ito mu kari ari imitang, tom ani kari supuling supuling nomokete sanamerem se anapeya memek ani angimik te aringiman mu balmonko. 21 Bare den suwanta tom ani nomokete sanamiwa biyala balem borta ko agila ani aitakta den ningi bagasam. Ani tom mu te iwita balem, ‘Ani kariimet kueman bare aking barasomonko ma balem borta ko ani aitakta nina nemekete den te sanamiwasam.’ Tom mu te ani uwutata balem se ko den ningi bagasam agilawo!”

22 Paul uwutata balam. Se Felix Munan Kris alo karo tuikasan mu nu ninguru ko ikikaso. Ale nu biguwura nukum kaolam, ale balam, “Kager kari nunga supuling biya Lysias tairuk asele ani nenenga den imi arigekko,” mam. 23 Ale nu kager kari supuling Paul bitaruwaram mu maonam, Paul tamon ale ninguru bitaru se bagomonko mam. Bare munan te la bitarmonko mam. Ale Paul ko singsang na yu meltutuk te sangarmonko negemon, mu me nunga kalomonko balam.

24 Tom saki namaram se Felix ko nuwus Drusilla ilak taiman. Drusilla mu Juda imet. Se Felix Paul ko den beteram se tairam ale Jesus Kristus ko nongomang ningi nunguning ko den balukaso se ikikaso. 25 Bare Paul munan diram, se nangata nanga bagara ko sinar tata, se Tutera ko Tom tairukko mu ko baluwaram se Felix nguangaram, ale balam, “Balem terong mam, am namarko! Udagi tom kuring bo arigek mu aking balik se tairko.” 26 Bare nu kuamin tugukaso mu Paul manga sang nu tuokko i makaso. Ale tom suen biya arukaso se taikaso, se ilak munaka lagakaso.

Yar ilagala namaram, se Porcius-Festus mu Felix kuwim te ali sor supuling ko aratam. Se Felix Juda alo nongomang kulukuokko munan bitakaso, ale Paul am talipara ningi bagurukko balam se bagakaso.

27